「東蓮覺苑」係一份結婚周年禮物？

又係時候同史友們介紹香港嘅一啲特色古蹟，中式傳統嘅宗教廟宇以往就同大家介紹唔少，呢啲傳統嘅廟宇大部分都係鄉眾集資建成。之但係，唔知史友們又知唔知，其實香港有一座名為東蓮覺苑嘅佛教場所，佢原理上可以算係一份結婚周年禮物嚟架！

東蓮覺苑位於跑馬地山光道15號，係香港島第一間佛教寺院，之所以會叫做「東蓮覺苑」，就係因為呢座建築物同早年嘅香港富商何東以及二太太張靜蓉（法號張蓮覺）有莫大嘅關係。喺1931年，當時係何東同埋張靜蓉嘅結婚周年，當時何東就送咗10萬嘅港幣畀張靜蓉作為禮物，而張靜蓉本身係篤信佛教，一早就已經喺波斯富街為家貧嘅女子設立咗佛教學校「寶覺第一義學」，後來亦都成立咗「寶覺佛學研究社」培育宏法女性。

咁講咁耐，到底張靜蓉呢十萬蚊點樣用呢？原來佢喺1932年就以1.7萬元投得跑馬地山光道一塊1.2萬平方呎嘅地皮，跟住仲用晒成筆錢興建東蓮覺苑及寶覺小學，成個工程就喺1935年完成，長年以嚟成為弘法嘅場所，現時仲被列為法定古蹟。